भारतीय स्टेट बैंक (एसबीआई) का महाप्रबन्धक श्री राम कुमार तिवारीले मिति २०८१ माघ ३ गते देखि नेपाल एसबिआई बैंक लिमिटेडको संचालक समितिमा भारतीय स्टेट बैंकलाई प्रतिनिधित्व गर्दै सोही मिति देखि नेपाल एसबिआई बैंक लिमिटेडको प्रबन्ध संचालक तथा प्रमुख कार्यकारी अधिकृतको पदभार ग्रहण गर्नुभएको छ । वहाँ नेपाल एसबिआई बैंकको प्रशासनिक प्रमुखको रुपमा यस बैंक तथा भारतीय स्टेट बैंक बीचको प्राविधिक सेवा सम्झौता अन्तर्गत खटीई आउनु भएको हो । बैंकको कार्यकारी प्रमुखको रुपमा वहाँले व्यवसायमा गुणात्मक वृद्धि, प्रभावकारीता, कार्यकुशलतमा सुधार र बैंकका सरोकारवालाहरूको मूल्य अभिवृद्धि सुनिश्चित गर्ने जिम्मेवारी सम्हाल्दै आउनु भएको छ ।

वहाँले सन् १९९८ मा भारतीय स्टेट बैंकमा परिक्षणकालीन अधिकृतको रूपमा आफ्नो सेवा सुरु गरी बैंकिङ्गका विभिन्न क्षेत्रहरू जस्तै शाखा संचालन, शाखा व्यवस्थापन, नयाँ व्यवसाय प्रवद्र्धन, लेखा, प्रणाली र लगानी, कोषगार, व्यापार वित्त, अन्तर्राष्ट्रिय बैंकिङ्ग आदिमा विशेषज्ञता हासिल गर्नु भएको छ । स्टेट बैंक अफ इन्डियामा २७ वर्षभन्दा बढीको उत्कृष्ट करियरको क्रममा वहाँले प्रबन्धक (कोषगार व्यवस्थापन समूह), सहायक महाप्रबन्धक (नयाँ व्यवसाय, कर्पोरेट सेन्टर), उपमहाप्रबन्धक (एनआरआई शाखा, मुम्बई), उपमहाप्रबन्धक (व्यापार र संचालन, प्रशासनिक कार्यालय ठाणे, मुम्बई), महाप्रबन्धक (नेटवर्क–३, भोपाल सर्कल) को महत्वपूर्ण जिम्मेवारीहरु सम्हाल्नुभएको छ, । वहाँको बैंकिङ्ग करियरमा, श्री तिवारीले संयुक्त राज्य अमेरिकाको न्यूयोर्क शाखामा उपाध्यक्ष र प्रमुख (व्यापार वित्त) र एसबीआई जापानको ओसाका शाखामा सहायक उपाध्यक्ष (प्रणाली र लगानी) को रूपमा वैदेशीक कार्यभार पनि सम्हाल्नु भएको छ ।

वहाँले व्यापार प्रशासनशास्त्र (बैंकिङ्ग र वित्त) मा  स्नातकोत्तर उपाधी हाँसिल गर्नुभएको छ । वहाँले कमर्सियल क्रेडिटमा सर्टिफिकेसन (CICC) (Moody’s), जोखिम व्यवस्थापनमा सर्टिफिकेसन कार्यक्रम, विदेशी विनिमयमा सर्टिफिकेसन कोर्स (IIBF), डिजिटल बैंकिङमा सर्टिफिकेसन कार्यक्रम (IIBF) समेत हासिल गर्नुभएको छ । वहाँ भारतीय बैंकर्स संस्थाका सर्टिफाइड एसोसिएट (CAIIB- Part I & II) समेत हुनुहुन्छ ।